Fight St Skopboks en MMA-klub presteer in Pretoria en Potchefstroom

Die klub is as die derde beste MMA-span aangewys by die Versus Grappling Cup, terwyl hulle ook sterk deelgeneem het aan die Mooirivier Challenge skopboksbyeenkoms.

July 9, 2025

Adele Louw 1 minute read

Die MMA-vegters wat medaljes in Pretoria ingepalm het, is voor Christoff van Jaarsveld (twee goud, 'n silwer en 'n vierde plek), Rohann van Jaarsveld (goud), Marlo Strydom (goud) en Emma Golden (goud en twee silwer). Agter is Charmaine Venter (drie goud), Benoré Meyer (twee goud), Shihan Chimmy van Winkel (afrigter), Megan Golden (drie goud), Patrick Steyn (twee goud en 'n silwer), en Francois Ackerman (afrigter).

Die Fight St Skopboks en MMA-klub van Khutsong het tydens die naweek van 5 Julie 2025 uitsonderlik goed gevaar by twee groot gevegskuns-kompetisies in Pretoria en Potchefstroom.

’n Span MMA-vegters van Fight St het aan die Versus Grappling Cup in Hatfield, Pretoria deelgeneem. Dié gewilde MMA-kompetisie het meer as 120 vegters van regoor Gauteng gelok. Ondanks sterk mededinging van groter stedelike klubs, het Fight St as die derde beste MMA-klub uit die kompetisie getree. Verskeie van hul vegters het medaljes huis toe gebring.

Op dieselfde dag het ’n tweede span van Fight St se skopboksers deelgeneem aan die Mooirivier Challenge in Potchefstroom. Hier het meer as 110 deelnemers, van so ver as die Noord-Kaap, hul kragte gemeet.

Volgens die klub se bekende afrigter, Shihan Chimmy van Winkel, is die Mooirivier Challenge soortgelyk aan die bekende Great North-toernooie. “Ek is baie trots op al ons vegters. Hulle het uitstekend presteer en ons klub se naam hoog gehou,” sê Van Winkel.

Die volgende groot MMA-geleentheid is die Grassroots-kragmeting vir jeug, junior en senior deelnemers wat op 19 Julie 2025 in Roodepoort gehou sal word. Fight St se skopboks-afdeling sal weer in aksie wees by die 2025 Women’s Cup, wat op 30 Augustus 2025 by die Barnyard Teater in Vereeniging plaasvind.