Rugbyliefhebbers by Hoërskool Carletonville het rede om uitbundig te wees nadat drie van die skool se spanne hul onderskeie ligas gewen het in Groep 4 van die Goue Leeus Liga.

Volgens die skool se woordvoerder, Sandra Venter, het die eerste span, tweede span en o.14-span almal as wenners uit die seisoen getree – ’n prestasie wat die skool se naam weer in rugbykringe laat weerklink.

Die eerste span het in hul finale wedstryd hul stempel afgedruk met ’n indrukwekkende 31–14 oorwinning teen Hoërskool Jan Viljoen, terwyl die o.14’s Reddam House met 22–17 geklop het. Die tweede span se oorwinning is nie in punte genoem nie, maar hulle is bevestig as ligawenners.

“Julle harde werk, deursettingsvermoë en spanwerk het vrugte afgewerp en ons is ongelooflik trots op julle almal,” het Venter gesê.