Lifestyle: Dekor
Daar is ‘n rooi voordeur en blou bottels in die vensterbank, vrolike harte pryk teen die baksteenmuur en ‘n heerlike koffiearoma vul die lug.
Marietjie van Niekerk van Mookgophong nooi ons in en ek neem sommer dadelik ‘n foto van die fyn vroutjie by haar vrolike voordeur. Sy is ‘n onderwyser in murg en been en om skeppend te wees, is haar passie. Van die ingangsportaaltjie tot in elke vertrek, kan haar liefde vir haar man, kinders en kleinkinders opgemerk word.
“Ek is mal oor kleur en is ‘n ‘ordelike’ regterbrein,” vertel sy laggend.
Elke vertrek het ‘n storie wat vir een van haar gesinslede bedoel is. Die feetjiekamer is vir Karen en Leah, die twee kleindogters. Die ngunikamer is vir Maryke, haar dogter, en die kamer met die boom vir Zak en Petro, wat die groei in hul huwelik verteenwoordig.
“Die boom is vir hulle wat gewortel moet wees in standvastigheid en saam moet groei in hul huwelik,” het sy aan Die Pos gesê. Die nguni het sy teen die muur geverf sodat sy dit nie kan verkoop nie. “Ek is mal oor nguni’s en elke keer as ek een skilder, dan verkoop ek hom, nou bly hy net daar,” het sy bygevoeg.
Elke kamer in die huis se tema is goed deurdink en is haar en haar man en beste vriend, Philip, se handewerk. “Die feetjiekamer was vir my die lekkerste projek en as ek saans die liggies aanskakel verbeel ek my soms dat ek hulle kan hoor,” het sy glimlaggend vertel.
Van Niekerk se skilderye hang oral in haar huis en pas perfek by elke vertrek.
Haar gunsteling is die skildery van ‘n engel teen haar slaapkamer se muur. “Sy is baie soos ek, sy wys die broosheid, wys dat sy soms wil wegvlieg, maar ook die sagtheid en die kaalvoete op die klip wys sterkte,” het sy vertel oor dié besondere skildery.
Sy het buite Potchefstroom by haar ouma grootgeword en sy het met groot heimwee vertel van haar kinderjare van buite speel, boomklim en moerbeie eet. Sy het Philip ontmoet terwyl hy in die weermag was in Potchefstroom en sy in Hoër Volkskool in die dorp. Hulle bly al 18 jaar in Mookgophong en haar idees en entoesiasme om haar huis mooi te maak, sal nooit ophou nie.
