Pretdag vir skoolseun se rugbydrome
Ruben Schmidt (18) , ’n matriekleerder aan Hoërskool Hans Strijdom, het al vroeg in sy hoërskoolloopbaan groot rugbydrome gehad.
Dié kranige rugbyspeler was as haker in die nommer twee trui een van die Hansies se topspelers en is onder meer vanjaar tydens die Mauritz Hansen-rugbyweek drie keer as speler van die wedstryd aangewys.
Ruben het nou die geleentheid gekry om aanstaande jaar by die Blou Bulle Tuks Rugby Akademie aan te sluit. Baie van die Blou Bulle se spelers het hul rugbyloopbaan by dié akademie begin en Ruben hoop om eendag ’n Blou Bul-trui oor sy kop te trek.
Die uitgawes om by die akademie aan te sluit, is egter baie hoog en hy moet self die geld bymekaar maak om sy droom te gaan uitleef.
’n Groot fondsinsamelingsprojek word op Vrydag 6 Desember by Weesgerus-vakansieoord buite Modimolle vir Ruben gehou.
Die dag skop reeds om 07:00 af met ’n groot mark. Weesgerus is op die betrokke datum reeds vol bespreek met vakansiegangers en uitstallers word genooi om stalletjies vir die dag te huur.
Stalletjies aan die buitekant van die saal kos R750 en binne in die saal is dit R1 000. Geen kosstalletjies word toegelaat nie (die oord verkoop self heerlike etes), maar uitstallers wat gebakte produkte soos beskuit wil verkoop, kan aansoek doen.
Die bekende kunstenaar Chris Else tree die aand om 19:00 by Weesgerus op. Kaartjies kos R150 vir volwassenes R80 per kind.
Else het ook ’n getekende Wêreldbeker-rugbytrui van die Australiese span, wat deur die spelers van die 2001-wêreldkampioenskap geteken is, geskenk. Dié trui sal tydens die geleentheid deur Freddie Breytenbach Afslaers opgeveil word.
’n Weldoener, Leandi Maritz van Mokopane, het aan Ruben ’n kitaar wat deur verskeie bekende Suid-Afrikaanse kunstenaars geteken is, geskenk en die Jacaranda FM-omroeper van die “Good morning Angels”-program, Dianne Broodryk, het onderneem om te help om die kitaar van die hand te sit sodat geld vir Ruben se rugbyloopbaan ingesamel kan word.
Uitstallers wat ’n stalletjie wil bespreek of mense wat kaartjies vir Else se vertoning wil bespreek of inligting verlang oor die getekende kitaar, kan vir Stephnie Erasmus bel by tel. 073 043 6050 of stuur ’n e-pos na brandzbotique@gmail.com(.)
