Die Dierebeskermingsvereniging (DBV) se hulp is op Dinsdag 6 Augustus ingeroep nadat ’n inwoner van Bela-Bela glo opgemerk het dat donkies by die munisipale vullissterrein staan en plastiek vreet.
’n Inwoner wat besig was om rommel af te laai, het Die Pos se kantoor geskakel nadat sy foto’s geneem het van die donkies wat tussen die hope rommel soek vir iets om te vreet.
Ronel Kruis, bestuurder van die DBV in Mokopane, het by navraag gesê dat hulle van dié donkies bewus is.
“Ons het die saak aan die nasionale DBV oorhandig wat die gebied binnekort sal besoek. Hulle sal dan bepaal of daar tekens van nalatigheid of dieremishandeling bestaan.”
Sy het gesê die eerste stap is om die eienaars van die diere op te spoor en hulle in te lig oor wat diereversorging in terme van wetgewing behels.
“Indien daar tekens is dat die diere mishandel word en die eienaars nie opgespoor kan word nie, kan die donkies na ’n veilige omgewing geneem word,” het sy gesê. “Daar duik gereeld klagtes in verskillende dorpe op van donkies wat mishandel word en bewerings dat donkie-eienaars nie goed na hul diere omsien nie.”
Kruis het by navraag gesê geen donkie mag binne ’n vullisterrein toegelaat word nie. Eienaars moet die diere buite die afgebakende gebied in die hande van ’n oppasser laat.
“Geen donkie moet aan rommel blootgestel word en dit as kos sien nie. Eienaars wat hul diere blootstel aan mishandeling of wanvoeding, kan deur die DBV vervolg word. Geen klagte van mishandeling kan deur die DBV geweier word nie,” het Kruis gesê.
“Die gebied wat ons vanuit Mokopane moet bedien is wyd en ’n logistieke uitdaging. Indien ons as die plaaslike DBV nie by ’n klagte kan uitkom nie, verwys ons dit na ons hoofkantoor.”
- ’n Bela-Bela-inwoner, Panki Morake (30), is begin Julie deur die Bela-Bela-landdroshof ’n stewige boete opgelê nadat die hof bevind het dat hy skuldig is aan dieremishandeling.
Die klag is deur Pieter Wagner, bekende sakeman in die dorp, gelê nadat hy die verwaarloosde diere in Van der Merwestraat aangetref het.
Die donkies was vol kneusmerke, het oop wonde gehad en was ondervoed.
Morake het ’n boete van R3 000 betaal, maar het nie sy donkies teruggekry nie. Die donkies is na die DBV in Silverton, Pretoria, geneem waar daar na hulle omgesien word.
