Raisibe Dorah Aschendorff (58) is die laaste naweek in November by haar huis in Hoep-Hoepstraat vermoor.
Sers. Frans Maponya, Bela-Bela-polisiewoordvoerder, het vroeër gesê ’n verdagte met wie sy ’n verhouding gehad het, het glo deur ’n venster toegang tot die huis verkry nadat sy hom nie wou inlaat nie.
Die polisie het Aschendorff dood in haar slaapkamer op die bed aangetref. Sy is talle kere met skerp voorwerpe gesteek.
Maponya het gesê die huis was ontsettend deurmekaar wat moontlik aandui dat Aschendorff haar teen haar aanvaller verset het. Twee messe en ’n kombuisvurk, waarmee sy vermoedelik gesteek is, is in die slaapkamer gevind, het Maponya gesê.
Die verdagte het kort ná die voorval spoorloos verdwyn.
- Die polisie is dringend op soek na Madala Humbulani (40) in verband met dié voorval.
Volgens die polisie is Humbulani oorspronklik van Thohoyandou en het hy vroeër in Cullinan gewoon. Hy het ’n vorige veroordeling van diefstal.
Hy het Aschendorff glo in 2015 in Pretoria ontmoet nadat hy vrygelaat is.
Die twee het later na Bela-Bela verhuis, maar het glo ’n onstuimige verhouding gehad, het die polisie gesê.
Mense wat inligting het oor waar Humbulani is, word gevra om vir AO Dana Smith te bel by tel. 083 513 3784 of vir AO André Van de Venter by tel. 083 604 1673.
