Volgens AO George Ledwaba van die polisie in Mookgophong is daar iemand dood in ’n skietvoorval op Dinsdag 31 Desember en nog iemand op Woensdag 1 Januarie in ’n mesaanval.
Albei verdagtes in die twee voorvalle het op Dinsdag 7 Januarie in die hof in Mookgophong verskyn op aanklag van moord. Thapelo Themba is aangekla van moord wat verband hou met die skietvoorval by ’n huis in sektor 1 waar ’n jong kind gesterf het. Hy het na bewering skote afgevuur en die kind noodlottig getref. Themba moet weer op Woensdag 15 Januarie in die hof verskyn. Geen borgtog is aan hom toegestaan nie.
In die mesaanval is ’n man dood nadat hy glo by ’n kuierplek aangeval is. Die name van die verdagte en die oorledene kon teen druktyd nie verskaf word nie.
In nog ’n voorval is ’n kerk glo geplunder en verskeie musiekinstrumente en ’n kragopwekker gesteel. Vyf verdagtes is aangekeer en het op Dinsdag 7 Januarie in die hof in Mookgophong verskyn. Vier van die verdagtes is op borgtog van R500 elk vrygelaat. Die vyfde verdagte is borgtog geweier.
In nog ’n voorval is ’n inwoner aangekeer toe hy op heterdaad betrap is waar hy diesel uit ’n vragmotor van ’n bekende winkelgroep getap en verkoop het. Die vragmotor was agter KFC in die dorp geparkeer toe die polisie toegeslaan het. Die verdagte is vrygelaat nadat hy ’n skulderkenningsboete van R1 000 betaal het. Volgens Ledwaba is daar in ’n opvolgondersoek daarna nog ’n man in sektor 1 in hegtenis geneem op aanklag van die besit van vermoedelik gesteelde diesel.
