Saamtrek vir vroue buite Mookgophong
’n Groot Mighty Women-konferensie (MWC) word vir aanstaande maand in Mookgophong beoog.
Die idee agter dié konferensies het ontstaan ná die gewildheid van die destydse Mighty Men-konferensies en versoeke daarna dat iets soortgelyks vir vroue aangebied word.
Volgens dr. Melané de Villiers, een van die stigterslede van Mighty Women, word ’n naweekkonferensie in Augustus by Badseloop net buite Mookgophong aangebied.
“Dit is ’n wonderlike geleentheid vir elke vrou wat haarself weer in Christus wil vind. God het dit op my hart gelê om MWC te begin en ek het die eerste konferensie in 2017 in Polokwane saam met twee ander stigterslede, naamlik past. Masingita Shabangu en Tracey du Preez, aangebied. Dit was ’n reusesukses waar vroue getuig het hoe God hul lewens verander het,” het De Villiers aan Die Pos gesê.
MWC het in 2018 uitgebrei na Gauteng waar ’n naweekkamp vir vroue gehou is en sedertdien is daar elke jaar konferensies in Limpopo en Gauteng aangebied. De Villiers het gesê hulle beoog om teen 2021 na die Kaap en Vrystaat uit te brei sodat vroue regoor Suid-Afrika die geleentheid kan kry om saam te aanbid.
MWC is ’n interkerklike en multikulturele Christelike organisasie waar vroue van alle ouderdomme en kulturele groepe bymekaar kom om te aanbid. “Hierdie konferensies is ’n plek waar elke vrou haar skoene kan uitskop, maskers afhaal, rus en bederf word — net ’n bietjie alleentyd, weg van al die druk,” het De Villiers gesê.
Vir meer inligting oor die volgende konferensie besoek MWC se webtuiste by: www.mightywomenconference.co.za of die Facebook-blad by mighty women conference of skakel tel. (015) 004 1053 of tel. 078 340 2763.
