Kansa Relay for Life om die draai
’n Agt uur lange staptog om bewusmaking van kanker te skep, vind eersdaags in Bela-Bela plaas.
Die Kankervereniging van Suid-Afrika (Kansa) se jaarlikse Relay For Life word op Saterdag 19 Oktober by Hoërskool Warmbad gehou. Vanjaar gaan die staptog net ’n agt uur lange aflos wees en nie ’n deurnag-staptog nie.
Die organisasie nooi inwoners om deel te neem en bewus te raak van die rol wat Kansa in die gemeenskap speel en hoe om hul risiko vir dié siekte te verlaag. Die hele gesin kan aan die staptog deelneem.
Vanjaar se tema is “Celebrate our Survivors”.
Die geleentheid skop af met mense wat kanker oorleef het. Hulle sal tussen 16:00 tot 17:45 met ’n lekker ete bederf word.
Die aflos spring om 18:00 weg met kankeroorwinnaars wat die eerste rondte sal stap. Daarna is hul versorgers aan die beurt — dus enigeen wat kankerlyers bystaan of voorheen bygestaan het, het Ansie van Heerden, Kansa se gemeenskapsmobiliseerder, gesê.
Daarna word die spanne aangekondig en begin die aflos met verskeie temarondes, wat beloof om groot pret te wees.
Die spanne met die beste gees en beste stalletjie word bepaal deur ’n spanstem soos in die gewilde TV-werklikheidsreekse.
Die Luminaria-seremonie, wat om 20:00 plaasvind, sal baie spesiaal wees wanneer alle ligte gedoof word en mense ’n kers kan aansteek ter ere aan iemand wat aan kanker dood is of tans kankerbehandeling ontvang.
Daar sal ook kosstalletjies wees om die honger mae te stil.
Toegang beloop R50 vir besoekers en R20 vir hoërskoolleerders. Laerskoolleerders hoef slegs ’n donasie te maak.
Spaninskrywings vir die aflos beloop R100 vir volwassenes, R50 vir hoërskoolleerders en laerskoolleerders kan ook net ’n donasie gee.
Alle ander borgskappe en donasies is welkom.
“Ons nooi ondernemings en groepe om so gou moontlik die komiteelede te nader vir inskrywingsvorms,” het Van Heerden gevra.
Vir meer inligting skakel tel. 074 149 2217 of tel. 076 409 4444. Vir spanwerwing skakel tel. 072 716 9397 of tel. 083 785 3942.
