Inwoners kuier by spogdinee
Die Naboom Tuiste vir Bejaardes het op Saterdag 26 Oktober ’n spoggerige dinee in die NG-kerksaal in die dorp aangebied.
Hercules Louw, voorsitter van die tuiste, het gesê geleenthede soos hierdie is baie belangrik om genoeg geld in te samel vir die versorging van die tuiste se 80 bejaardes.
Volgens Louw skiet die bedrag wat bejaardes per maand betaal ver tekort en kos dit die tehuis aansienlik meer per inwoner.
“Ons kan egter nie die prys verhoog nie, omdat die ekonomie maar orals druk,” het hy gesê.
Die dinee se kaartjieverkope het glad verloop en 154 gaste het plek bespreek. Die gaste was spoggerig geklee en het die sesgangmaaltyd baie geniet. “Ons het die aand só geniet,” het Lettie Lombaard, een van die gaste, gesê.
Volgens Louw is die tehuis se uitdagings minder sedert die aanstelling van Bidvest om te help met die bestuur van die kombuis, skoonmaak en tuine. Dit is ook nie meer net uitsluitlik ’n “ouetehuis” nie, maar ’n versorgingsoord. Daar is 60 bedlêende bejaardes wat voltyds versorg word en daar is maandeliks baie aankope wat gedoen moet word vir die versorging van al die inwoners. Louw het vir Toeks Erasmus, wat die dryfkrag agter die heerlike dinee was, geloof vir die wyse waarop sy onverpoos werk om geld in te samel.
Erasmus het op haar beurt almal wat ’n bydrae gelewer het, bedank vir hul onbaatsugtige ondersteuning.
“Die lys van skenkers is so lank, dat ek dit op die agterkant van die spyskaart laat druk het,” het sy gesê.
Die kombuispersoneel van die tuiste het die kos voorberei en Shangri-la Country Hotel het gesorg vir die nagereg en kaasborde.
’n Oudleerder van Hoërskool Hans Strijdom, Annemarie Mailovich, het die gaste bekoor met haar sang.
