Beurtkrag hou gevaar vir landelike veiligheid in
Suid-Afrikaners is onkant betrap toe daar weer kort ná Nuwejaar — ondanks beloftes van pres. Cyril Ramaphosa dat dit nié sal gebeur nie — beurtkrag toegepas is.
Hierdie ongeskeduleerde beurtkrag lei tot frustrasie en hou ernstige gevaar vir landelike veiligheid in, maan kenners.
Henk van de Graaf, voorsitter van die TLU se noordstreek en voorsitter van die Waterberg DLU, het sy kommer uitgespreek oor gebrekkige kommunikasie tydens beurtkrag.
Selfoonnetwerke is verlede jaar gekortwiek met die instelling van fase 3- en 4-beurtkrag. Verbruikers se toegang tot die internet, sekere netwerke en toeps was beperk en in sommige gevalle glad nie beskikbaar nie. Van de Graaf meen dit verhoog die gevaar in landelike omgewings omdat mense nie in kennis gestel kan word van plaasaanvalle, veediefstalle of mediese noodgevalle nie.
“Ons het nie in die verlede tydens beurtkrag ’n gebrek aan sein ervaar nie, wat beteken dat selfoondiensverskaffers se instandhoudingswerk net so swak soos Eskom s’n geraak het.
Van de Graaf meen daar moet ononderbroke kommunikasie tussen boere wees. Ook motorhekke wat deur middel van selfoonverskaffers se simkaarte funksioneer, moet ten alle tye werk.
Van de Graaf het die probleem met Vodacom bespreek en volgens hom het die maatskappy erken dat beurtkrag selfoondienste beperk omdat die netwerk van elektrisiteit afhanklik is.
Wanneer fase 2-beurkrag en hoër toegepas word, ondervind Vodacom groot probleme omdat die kragopwekkers en die batterye wat selfoontorings operasioneel hou, nie genoeg tyd het om te herlaai voordat die volgende ronde beurtkrag volg nie. Die voorsiening van brandstof vir die kragopwekkers is ook soms ’n logistieke uitdaging.
Futuse Bongo, Vodacom-woordvoerder, het by navraag aan Die Pos gesê hy wil kliënte gerusstel dat voorkomende maatreëls getref word om die nasionale kragkrisis teë te werk.
“Ons het reeds bykomende hulpbronne, batterye en kragopwekkers op talle plekke regoor die land opgerig en Vodacom doen alles in sy vermoë om die gevolge van uitgebreide beurtkrag te verminder,” het Bongo gesê.
“Vodacom kan sy kernnetwerk in stand hou solank hulle toegang tot brandstof vir hul kragopwekkers het.
“Ons het planne om ons sleutelpersele te beskerm en bykomende stappe te doen in die lig van die krisis.”
Hy het gesê die primêre netwerk is steeds veilig, maar in ’n krisistyd sal die volhoubaarheid daarvan van die beskikbaarheid van brandstof afhang.
