Daleen Steynberg, Bela-Bela, skryf:
Die algemene gevoel onder Bela-Bela-inwoners is nie positief nie — almal kla.
Die nuwe munisipale begroting het op Maandag 1 Julie in werking getree, maar die vraag op almal se lippe is: wat het van die vorige begroting se geld geword?
Die straatnaamborde is steeds nie herstel nie. Daar is oral slaggate, watervermorsing is alledaags, rioolprobleme duik steeds op en straatligte werk nie.
Dit het tyd geword dat die munisipaliteit tot verantwoording geroep word vir alles wat agteruit gaan. Ons word baie belowe, maar alles bly dieselfde.
Hier en daar word iets gedoen net om belastingbetalers se monde te snoer, maar dit is nou genoeg.
Dit maak nie sin dat straatligte bedags brand en nie snags werk nie. Dit is ’n mors van tyd om die klagtelyn by die munisipaliteit te skakel. Die lyn is altyd beset en wanneer jy ’n slag met iemand gepraat kry, val jou klagtes op dowe ore.
Ek vra inwoners se samewerking. Ons moet gereeld by die owerhede kla totdat hulle sat is daarvan. Skriftelike klagtes help niks.
Selfs die maandeikse veiligheidsvergadering by die Bela-Bela-polisiestasie word skraps bygewoon. Amptenare versuim om vir hierdie vergaderings op te daag.
Daar behoort meer as 50 lede teenwoordig te wees, maar verlede maand was daar slegs 17. Die munisipaliteit skitter in hul afwesigheid en die departemente se afgevaardigdes is net so skaars.
Ons kan nie ’n dorp in stand hou met sulke traak-my-nie-agtige houdings nie.
Selfs buurtwaglede, Eskom en veiligheidsondernemings is traag om dié vergaderings by te woon. Elke rolspeler ontvang tog maandeliks ’n kennisgewing van dié vergadering. Niemand kan sê dat hulle nie daarvan geweet het nie.
Ek spreek my dank uit teenoor die lede wat die moeite doen om daar te wees.
Ek wil weer ’n beroep doen op inwoners om aan te hou om hul klagtes na my te SMS by tel. 082 787 5067. Ek sal aanhou totdat dit deurdring na die verantwoordelike persoon.
