Tammy Breedt, VF Plus-LP en hoofwoordvoerder, skryf:
Mislukte en halfgebakte landbouprojekte van die regering, soos die Agriparke-projek, is ’n remskoen vir georganiseerde landbou en een van die groot redes vir die mislukking van opkomende swart boere.
Suid-Afrika se boere is tans uitgelewer aan uiterste weersomstandighede en droogtes, asook aan mislukte departementele projekte wat niemand in die landbousektor ophef of help nie.
Kommersiële boere moet ondersteun en beskerm word om die nodige werkgeleenthede te skep en uit te brei om sodoende volhoubare landelike ekonomieë te ontwikkel en om voedselsekerheid te bevestig.
Die fokus van die departement van landbou bly egter op onrealistiese projekte soos Agri-parke wat goed lyk op papier, maar in werklikheid onuitvoerbare mislukkings is.
Meer as 20% van die huishoudings in Suid-Afrika het nie voldoende toegang tot voedsel nie en daarom moet voedselsekerheid beskerm word deur kommersiële landbou te stimuleer en te ontwikkel.
Die nuwe saamgestelde departement van landbou, bosbou en visserye, asook landelike ontwikkeling en grondhervorming, moet ’n behoorlike skakel op nasionale-, provinsiale- en munisipale vlak bewerkstellig om te verhinder dat projekte nie tussen die krake wegraak en ’n teelaarde vir korrupsie word nie.
Dit is belangrik dat verkrygingsprosesse korrek funksioneer en wetgewing gehoorsaam word om seker te maak dat die politieke wil daar is om nodige veranderinge te bring en van projekte ’n sukses te maak.
Groot drome kan wel gedroom word, maar as die regte en soms ongewilde besluite nie geneem word nie, sal Suid-Afrika se mense altyd honger ly.
