
Louis Meintjes, president, TLU SA, skryf:
TLU SA maak gereed om grondeienaars by te staan in sake rakende onteiening sonder vergoeding.
Dit volg ná Woensdag 6 November se samesprekings met die ad hoc-komitee wat deur die parlement aangestel is om voorstelle in te dien oor hoe art. 25 van die grondwet — wat handel oor onteiening sonder vergoeding — aangepas moet word.
Dit is duidelik dat die komitee se fokus uitsluitlik is hoe die wet gewysig moet word en nie wat die gevolge van die wysigings sal wees nie.
Enige insette van belanghebbende rolspelers wat landbouers verteenwoordig is telkens eenvoudig afgemaak as onbelangrik.
Dit is uiters kommerwekkend dat aspekte soos die uitwerking op die ekonomie, beleggingsonsekerheid, graderings deur kredietagentskappe en die heel belangrikste, voedselsekerheid, geen gewig dra in hierdie proses nie.
Die enigste saak van belang is dat grond onteien moet word ten spyte van meervuldige voorbeelde van hoe dit weens korrupsie, onkunde en gierigheid misluk het en nie tot voordeel van Suid-Afrika is nie.
Die stoomrollerproses om die wysiging aan die parlement voor te lê, is ook onder verdenking.
Die komitee stel voor dat ’n konsepwet teen Woensdag 27 November klaar geskryf is, waarna dit teen middel Desember en die begin van Januarie aanstaande jaar vir vier weke vir openbare kommentaar beskikbaar sal wees.
Openbare verhore vind in Februarie plaas en op 20 Maart aanstaande jaar sal dit finaal by die komitee wees voordat dit op 31 Maart aanstaande jaar aan die parlement voorgelê sal word.
TLU SA het reeds aanbevelings op internasionale vlak en van internasionale regskenners ontvang, en sal dit so spoedig as moontlik bekend maak.
Dit is egter duidelik dat die komitee die proses as ’n formaliteit beskou en dat die wysiging nou slegs deur gemeenskapsdruk en litigasie beveg kan word.
Ons doen daarom ’n beroep op Suid-Afrikaners wat besorg is oor die beskerming van landbou, voedselsekerheid en eiendomsreg om TLU SA se Eiendomsregfonds te ondersteun en te versterk vir die komende hofsake.