Inwoner wat omgee, Bela-Bela, skryf:
Dit is met uiterste misnoeë dat ek hierdie brief skryf met betrekking tot die vuurwerke wat op Oujaarsdag afgevuur is.
Ek verwys na die wet op dierebeskerming, asook die “Explosives Act No. 26 of 1956”. Hierin word gespesifiseer dat daar besliste bepalings en toestemmings vereis word om vuurwerke af te vuur.
Die vraag ontstaan hoekom dit toegelaat word dat hierdie vuurwerke in die middel van die dorp, naby ouetehuise en ander openbare plekke, afgevuur word sonder dat enige stappe teen die oortreders gedoen word. Gebruikte vuurwerkafval het op Woensdagoggend 1 Januarie orals in die strate en buite sekere sakeondernemings, wat bekend is vir die verkoop van vuurwerke, gelê.
Die erge trauma wat diere in die dorpsgebied ervaar het, is bekend. Ek praat nie eens van die diere wat alleen was terwyl hul eienaars met verlof was nie. Ek wonder of enigeen wat vuurwerke afvuur al ooit gaan kyk het na die verskriklike beserings van diere wat deur drade en selfs vensters spring om te vlug van die geweldige geraas van hierdie mensgemaakte gemors?
As jy bewus is van die lyding van so ’n dier, is dit werklik nodig dat jy die direkte oorsaak daarvan moet wees of gee jy regtig nie om nie? Wat van die diere in die plaaslike dieretuin wat vasgevang is in hokke? Kan jy jouself die trauma van die arme diere voorstel?
Wat van die diere in die talle natuurreservate in ons omgewing?
En hoekom word daar geen stappe gedoen teen diegene wat hierdie regulasies openlik oortree nie?
Ek wonder of ek die enigste een is wat só sterk hieroor voel. Dit is hartverskeurend om die lyding van diere te sien. Dit kan slegs verander as die mense in beheer die regte besluite neem.
