Die woning van die Nederlandse ambassadeur, Joanne Doornewaard, is op Woensdagaand in ’n feesterrein omskep toe dit die jaarlikse Nederlandse Koningsdagfeeste aangebied het.
Dié aand was ’n unieke geleentheid vir die Nederlandse gemeenskap om saam te kom en Koningsdag in die hartjie van Pretoria te vier.
Koningsdag word jaarliks regoor die wêreld gevier ter herdenking van Koning Willem-Alexander van Nederland se verjaarsdag, 27 April.
Doornewaard het almal hartlik verwelkom en die feesvieringe amptelik geopen.
Dié geleentheid het ’n diverse skare gelok – van uitgewekenes tot plaaslike hooggeplaastes – om aan die viering van die Nederlandse kultuur en tradisie deel te neem.
Gaste het gesmul aan ’n heerlike verskeidenheid Nederlandse lekkernye wat krokette, haring, bitterballe, tompouce en stroopwafels ingesluit het.
Dié wye verskeidenheid is ’n bewys van die ryk en diverse koskultuur van Nederland.
Die hoogtepunt van die aand was die Hollandse musiek wat die gaste bekoor het.
Daar was ’n jolige mengsel van tradisionele Nederlandse volksliedjies en meer moderne liedjies wat mense van oud tot jonk op hulle voete gehad het. Gaste het saam gedans en gesing, wat ’n gevoel van kameraadskap en vreugde verseker het.
“Die Koningsdagviering is ’n geleentheid vir ons om ons ryk kultuur en erfenis met die mense van Suid-Afrika te deel,” sê een van die gaste, Jean Boon.
“Dit is vir my so ongelooflik lekker om te sien dat so baie mense saamkom om hierdie spesiale dag te vier.”
Zelien Zweers woon vir die afgelope 13 jaar saam met haar gesin die feesvieringe by. “Ek sien elke jaar uit na Koningsdag. Dit is ’n fantastiese viering, vol pret, heerlike kos en lekker musiek. Dis ’n wonderlike manier om die Nederlandse kultuur hier in Pretoria te ervaar.
“Ek is mal oor die Nederlandse kos. Die krokette en stroopwafels was my gunsteling,” sê sy.
Die feesvieringe het ’n blywende indruk gelaat wat die vriendskapsbande en kulturele uitruiling tussen Nederland en Suid-Afrika versterk het.
Het jy dalk meer inligting rakende dié storie? Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie
