Cindy kerf op geweerkolwe

CHARL CILLIERS – Me. Cindy Adendorff (25) het haar roeping as kunstenaar gevind.

Sy is egter nie net ’n gewone kunstenaar wat op doeke of papier haar kuns vasvang nie, maar eerder op die kolwe van vuurwapens.

Sy het op Charl Cilliers grootgeword en na skool as bestuurder by ’n kampeeronderneming gewerk, totdat sy verlede jaar besluit het om te bedank en haar droom as kunstenaar na te jaag.

Me. Adendorff het haarself geleer skilder toe sy op 15 eers met potloodsketse begin het.

“Ek het in die begin net gesigte geteken en later met olieverf begin skilder,” het sy gesê.

Sy is lief vir perde en ry graag perd as sy hulle nie skilder of aan die kolwe werk nie.

Haar pa, mnr. Marius Adendorff, is ’n wapensmit en haar ouers het haar aangemoedig om op die kolwe te begin kerf.

“Ek geniet dit baie en wil niks anders doen nie,” het me. Adendorff gesê oor haar beroep as kunstenaar.

Sy het klasse in houtsneewerk by me. Yolandié Olwagen geneem toe sy 21 was en me. Olwagen het haar gehelp toe sy vir die eerste keer haar kuns op geweerkolwe begin uitkerf het.

“Me. Olwagen se hulp het ’n groot verskil gemaak,” het me. Adendorff gesê.

Sy werk tans aan kolwe wat sy by die Jagtersskou in Midrand gaan uitstal.

“Dit is my eerste skou en ek neem 15 kolwe saam,” het sy gesê.

Sy is genooi om by die skou wat einde April plaasvind, te gaan uitstal.

Sy kry bestellings van sover as Noorweë en Nederland vir haar kolwe van hoofsaaklik jaggewere.

“My heel eerste bestelling vir ’n kolf was vanuit Noorweê,” het sy gesê.

Sy kerf van olifante tot meerkatte op die kolwe uit.

“Ek fokus op 3D en kerf die tonele realisties uit.

“Dit is lekker om my kunstigheid te kan uitleef en daar is min mense wat dié voorreg het,” het sy gesê.

Hoewel sy nie op haar skilderye fokus nie en dit net as ’n stokperdjie beskou, kan ’n mens haar skilderye wat wissel van tonele met perde tot Spaanse dansers, ook koop.

Besoek haar webtuiste by www.gunstockcarvingbycindy.com.