Ondersteun stappers op hul lang pad
Die Kruis Krygers, Gauteng is ’n groep stappers wat beoog om gedurende Maart met ’n kruis vanaf Gauteng tot in Limpopo te stap.
Die beplande sewe dag roete begin op 4 Maart by Heidelberg, deur Nigel, en Brakpan tot in Benoni.
Op dag twee (5 Maart) sal die stappers vanaf Benoni vertrek, deur Kemptonpark, Olifantsfontein, Irene en Centurion beweeg tot in Pretoria.
Op dag drie (6 Maart) word daar vanaf Pretoria na Pienaarsrivier geloop en op dag vier (7 Maart) gaan die groep tot in Bela-Bela (Warmbad) stap.
Op dag vyf (8 Maart) gaan hulle vanaf Bela-Bela deur Modimolle (Nylstroom) tot in Mookgopong (Naboomspruit) op en dan op die voorlaaste skof, op dag ses, (9 Maart), word die tog van Mookgopong tot in Mokopane (Potgietersrus) aangepak.
Die laaste skof word op dag sewe (10 Maart) vanaf Mokopane aangedurf en sal eindig by Mighty Men (MMC) Limpopo net voor Polokwane (Pietersburg). MMC Limpopo begin op 11 Maart en eindig op 13 Maart.
“Ons wil graag die tog aanpak om mense se gebedsversoeke te ontvang, mense te bedien op die roete en waar moontlik, behoeftige mense te help met klein geskenke,” het Gert van Rensburg van die Kruis Krygers, Gauteng gesê.
Belangstellendes kan vir Van Rensburg by 082 974 0886 kontak.
