Motorfietsklub skenk fondse aan tehuis

Lede van die Ghost Riders Motorfietsklub het Saterdag ‘n skenking van R15 000 gemaak aan die Ebenhaeser Tehuis vir Bejaardes.

Talle van die klub se lede het ook opgedaag om gesellig te verkeer met die bejaarde inwoners.

Die hoogtepunt was egter die oorhandiging van die broodnodige skenking.

Louise Kok, bestuurder van die tehuis, het emosievol gesê dat die skenking met groot waardering ontvang word.

“Ons almal staar maar moeilike tye in die gesig maar ons hier by Ebenhaeser is werklik geseënd danksy mense soos die motorfietsryers,” het Kok gesê.