Oud-Volkie mik vir meestersgraad in onderwys
Christopher More (23), ’n oud-Volkie, het sy onderwys graad met lof geslaag en mik nou na sy meestersgraad.
Christopher is ’n onderwyser by Hoërskool JW Luckhoff, ’n skool vir kinders met leerprobleme, fisiese gestremdhede of gedragsprobleme.
Christopher moes van ’n jong ouderdom af grootmens-skoene aantrek; hy het sy pa aan die dood afgestaan in sy Graad 10 jaar en sy ma in Graad 12 jaar.
“My tienerjare was maar moeilik. My ouma het alles in haar vermoë gedoen om ons kinders te help, maar dit het soms swaar gegaan,” het Christopher vertel.
Sy ouma, Sindiwe Kula, het as huishulp by Heidelberg dokter Hannes Snyman en sy gesin gewerk en is op 68 jaar in Februarie oorlede, slegs ’n week voordat hy by Hoërskool JW Luckhoff begin het.
Op 23 is Christopher nou die pleegouer van sy sussie (14) en neef (9).
“Ek weet hoe dit gevoel het om alleen deur jou skoolloopbaan te gaan en ek wil nie hê my sussie of nefie moet alleen voel nie.
“Ek wil hulle leer dat al is jy ’n weeskind, hoef jy nooit op te gee nie. Daar is altyd ’n toekoms. Dit hang van jouself af,” het Christopher, wat in die proses is om sy nefie wettiglik aan te neem, gesê.
Christopher het by die Noordwes Universiteit se Vaal kampus studeer en wou oorspronklik maatskaplike werk studeer. Nadat hy sy passie vir boeke gevind het op pad na sy tweede jaar, het hy sy studierigting na onderwys verander.
“Onderwys gaan nie net oor skool gee nie, maar oor ’n liefde vir kinders,” het hy vertel.
Om te werk en terselftertyd te studeer was ’n saak van trots en deursettingsvermoë vir Christopher. Hy het dit sy lewensdoel gemaak om sy ouma wat soveel opgeoffer het trots te maak op hom. Hy was eers by Hoërskool Vanderbijlpark en nadat hy sy onderwys graad met lof geslaag het, is hy op 1 Maart by JW Luckhoff aangestel.
“Die kinders by Luckhoff kom uit moeilike omstandighede en dit is soms uitdagend om dissipline toe te pas, maar ek het ’n goeie verhouding met die kinders en bou maklik ’n vertrouensband met hulle.
“Ek glo as jy ’n kind se hart het, het jy sy vertroue en dan is dit maklik om my taak as onderwyser te verrig,” het hy vertel.
Christopher se gunsteling vak is rekenaartoepassingstegnologie. Hy glo dat die vak verplig moet wees, want elke kind moet rekenaarvaardighede hê.
Christopher wil graag sy meestersgraad binne die volgende drie jaar bereik.
Toe hy gevra is wat hom positief hou, was sy antwoord: “Ek is net dankbaar vir wat my ouers en my ouma vir my gedoen het, en veral vir die rol wat dokter Hannes, sy vrou Ina en hul dogter Nicolene in my lewe beteken het. Ek wil almal net trots maak.”
