Rolstoel skenking maak ‘n verskil
’n Skenking van rolstoele van die Heidelberg Mall het dit vir die Suikerbos Aftreeoord moontlik gemaak om ’n verskil in ander se lewens te maak.
Die Suikerbos Aftreeoord het op 28 Junie ’n skenking van twee rolstoele vanaf Annemarie Janse van Vuuren en die Heidelberg Mall ontvang.
“Ek en ons drywer, Petros Tsotetsi, het verby een van die haweloses in die dorp gery wat gebruik maak van ’n rolstoel,” het Marlene Walkden, ’n maatskaplike werker by die oord, vertel.
“Petros het genoem dat hy die man, Amos, ken en dat sy vorige rolstoel stukkend was.”
Amos Molefe (40) kan oorkant die polisiekantoor in Voortrekkerstraat gesien word en is sedert 2004 in ’n rolstoel na hy in ’n ongeluk sy bene verloor het.
Walkden en Tsotetsi het met hart-op-die-mou vir hul matrone gevra of hul een van geskenkde rolstoele vir Amos kon skenk.
“Petros en die tehuis se vakman, Brayn, het nog daardie selfde dag vir Amos sy nuwe rolstoel gevat,” het Walkden gesê.
“Ons voel geëerd om ‘n verskil te kan maak in iemand soos Amos se lewe, al is dit klein.”
