Huis in Jordaanpark vereer met blou plaatjie
Tussen 1932 en 1937 het Wouter Geerling, wat ’n inspekteur by skole was, saam met sy gesin daar gewoon.
Die ‘huis onder die berg’ te Wesstraat 24, Jordaanpark, was in 1909 gebou, en omdat die huis die punt van Suikerbosrand as uitsig van die stoep gehad het was dit Entabeni, wat onder die berg beteken, gedoop.
Die huis is op 10 September vereer met ‘n blou erfenisplaatjie.
JS Joubert, wat ook die bouer van Laer en Hoër Volkskool en die koshuise Excelsior, Transvalia en Concordia was, was verantwoordelik vir die boukuns agter die huis wat moontlik die oudste huis in Jordaanpark is.
Die huis was in 1914 deur die regering gekonfiskeer en aan senator Francious (Frank) Robertson verkoop in 1940. Straatname soos Monastraat en Frank Robertsonstraat in Jordaanpark is na die senator en sy vrou vernoem.
Tussen 1932 en 1937 het Wouter Geerling, wat ’n inspekteur by skole was, saam met sy gesin daar gewoon.
In ’n brief van Wouter se dogter aan die huidige eienaar, Dirk Kruger, het sy vertel van die windpomp in die erf waar bobbejane kom water drink het.
Sy het ook vertel dat die huis in daardie tyd beskou was as buite die dorp en dat daar ’n smal grondpad was wat tot by die huis geloop het.
Sy onthou ook van die sneeu wat Heidelberg verras het tydens hulle verblyf daar.
Dirk Kruger en sy vrou, Sylvia, het die huis in 1991 gekoop en spog steeds met die oorspronklike waterput en selfs van die bome in die erf is meer as ’n honderd jaar oud.
“Ons is lief vir oudhede en die erfenis aan die huis se geskiedenis maak ons trots om die eienaars te wees,” het Dirk vertel.
