Nostalgie stroom in op Erfenisdag by die Heidelberg Great Train Race
Talle mense het by die spoor in Stasiestraat gewag vir die aankoms van veteraan motors, motorfietse en die luukse passasiers trein Rovos Rail.
Die gebrul van veteraanmotors en motorfietse, die druis van vliegtuie en die salige klanke van ’n stoomlokomotief was die hoogtepunt op Erfenisdag in Heidelberg.
Wat die jaar ekstra uniek gemaak het, was die deelname van die luukse Rovos Rail stoomlokomotief.
Passasiers het kaartjies in Pretoria gekoop wat ’n ete by die lughawe ingesluit het. Plaaslike braaier Johan Scott het gesorg vir ’n skaap op die spit.
Besoekers het van vroeg op 24 September by Stasiestraat saamgedrom in afwagting vir die geluid van die stoomtrein.
Verskeie kos-stalletjies was beskikbaar vir besoekers om te kies en te keur. Die nuutse karmodelle en Conqueror kampeeerwaens was ook ter uitstalling saam met verskeie ander plaaslike produkte.
In 1930 het die Bentley Sportsman Coupe, wat bekend staan as die Speed 6 Bentley, die Franse bloutrein in ’n 750 myl resies gewen.
Die Heidelberg Great Train Race salueer hierdie historiese oomblik jaarliks op Erfenisdag met ’n konvooi klassieke motors en motorfietse, ’n stoomtrein en veteraanvliegtuie wat harmonies amper gelyk by die Heidelberg Stasie inkom.
Op versoek van die Vintage en Veteran-klub, wie se doelwit dit is om veteraanmotors en motorfietse saam te kry, is Van Zyl Shultz hierdie jaar gevra om die Heidelberg Great Train Race te organiseer.
Na aanleiding van die honderde besoekers by Stasiestraat en al die stalletjies wat daar opgelsaan was, was die dag ’n sukses.
Besoekers van so ver as Houtbaai, Tzaneen en Lichtenburg het kom kyk na die skouspel. Dit is die derde jaar dat Heidelberg die glansgeleentheid aangebied het.
“Dit is vir die Suikerbosrand en Heidelberg Aviation Association ’n voorreg om erfenis op hierdie uniek manier te vier,” het Schultz gesê.
Gerhard Campher van Tom Campher Motors, een van die oudste Volvo handelaars in Suid-Afrika, het gesê: “Ons is trots om gekoppel te word aan die Heidelberg Great Train Race.”
Georginia Clark Crawford, ’n Rovos Rail passasier, het vertel: “Dit is my eerste keer in Heidelberg. Ek het nog nooit so ’n ongelooflike gebeurtenis ervaar nie. Ek bespreek alredds my kaartjie vir volgende jaar.”
Botho Barei, wat studeer om ’n kommersiële vlieënier te word, het gesê: “Dit was ’n wonderlike dag. Ons het ander vlieëniers ontmoet. Ek was oorweldig deur die klassieke motors en hoe goed die dag ge-organiseer was.”
Die oudste motor was ’n 1915 Model T Ford en die oudste motorfiets was ’n 1909 Durkopp. Daar was ook verskeie Tigermoths wat vanjaar hul 90ste bestaansjaar vier.
Besoekers het ook nie geskroom om aan te pas by die tydsone van die karre nie en was getooi in gepaste uitrustings.
Schultz het plaaslike maatskappy vir hulle bydrae en borgskappe om hierdie geleentheid moontlik te maak bedank.
