Potte prut tydens potjiekos kompetisie by PPK Nigel
Pastoor paar Danie en Poppedyn het elkeen bedank wat bygedra het tot die sukses van die dag.
Die potte het behoorlik geprut tydens die PPK Nigel se potjiekos kompetisie, wat op 26 Oktober gehou is.
Die kompetisie was deel van die kerk se fondsinsamelings projekte vir die jaar en het plaasgevind op die kerk se grasperk.
‘n Skaapskenkel, beesstert, beesnek, vark, hoender en biltong potte het geprut en die geurige reuke het tot ver getrek.
Vir nagereg was daar ‘n poedingpot en terwyl potte geprut het, kon daar aan vars gebakte pannekoek gesmul word.
Danie en Poppedyn Hartzer wat vir die afgelope 23 jaar leraars by die gemeente is, het hul dankbaarheid uitgespreek teenoor elkeen wat deelgeneem het en bygedra het tot die dag se sukses.
Die potjie koning was Danie Hartzer (junior) met sy biltong pot.
Potte was beoordeel deur die Koegelenberg egpaar, Martie du Preez en Joost en Ina Hogewoning.
