Helikopterverrassing vier geliefde skoolhoof se 64ste verjaarsdag by Laer Volkskool
Met gesing, ‘n rooi tapyt en 'n dramatiese aankoms uit die lug, het Laer Volkskool hul skoolhoof op 'n dag gevier wat vir altyd onthou sal word.
Dinsdagoggend, 10 Junie, het Laer Volkskool Heidelberg vir ’n paar minute tot stilstand gekom toe ’n helikopter stadig op die skool se sportgronde neergesak het – alles vir een baie spesiale rede.
Piet Strydom, die skoolhoof, is vroegoggend by die skool ‘ontvoer’, waarna ’n 1958 Cadillac hom opgelaai het. Daarna is sy vrou, Ina, wat by Hoër Volkskool skoolhou, ook opgelaai. Die paartjie is toe na die Heidelberg-vliegveld geneem waar ’n helikopter op hulle gewag het.
FOTO: Foto verskaf deur: Teen die muur
Vanuit die lug kon die Strydoms sien hoe die leerders op die rugbyveld ’n hart gevorm het. By die skool aangekom, is daar ’n rooitapyt vir hom uitgelê, en hy is toegejuig met gesang en gelukwense.
Die verrassing is deur die beheerliggaam, onderwysers en leerders gereël om die geliefde skoolhoof se 64ste verjaarsdag op ’n unieke manier te vier.
“Ons wou iets besonders doen om vir Piet te wys hoeveel ons hom waardeer,” het een van die onderwysers gesê.
“Hy is al vir jare ’n pilaar van hierdie skool – altyd positief, vol energie en geliefd deur almal.”
Die helikopter, wat spesiaal vir die geleentheid gehuur is, het net ná 09:00 geland. Die hele skoolgemeenskap was buite om dié onvergeetlike oomblik saam te beleef.
Daarna is daar ’n spesiale saamtrek in die saal gehou, waar kollegas en leerders hul dank en gelukwense met warmte gedeel het.
FOTO: Willem Sprong
Duidelik oorweldig het Strydom gesê: “Ek het al baie verjaarsdae gehad, maar hierdie een sal ek vir altyd onthou. Dankie aan elkeen wat dit moontlik gemaak het. Ek voel geëerd en nederig.”
Met ballonne, koek en hope liefde was dit nie net ’n dag om Strydom te vier nie, maar ook ’n herinnering aan die sterk bande en waardering binne die Laer Volkskool-gemeenskap – ’n dag wat vir lank onthou sal word.
