Heidelberg se VLU Rensburg-tak leer oor besoedeling en volhoubaarheid
Die VLU Rensburg-tak het omgewingsbewustheid, geloofsbetekenis en kreatiwiteit saamgevoeg in ’n vergadering vol inspirasie.
Die VLU Rensburg-tak het op 12 Augustus tydens hul maandelikse vergadering drie gassprekers van The Biodiversity Company verwelkom.
Die organisasie werk om besoedelingsrisiko’s te voorkom en te bestuur, met ’n praktiese benadering wat alle rolspelers, sowel as die omgewing in ag neem.
Sarah Oxley, Catherine Mathye en Chelsea Whitfield het insiggewende feite gedeel oor die besoedeling van lug, water, grond en selfs lig.
Volgens hulle produseer Suid-Afrika jaarliks sowat 54 miljoen ton afval, waarvan slegs 10% herwin word.
Die res beland in riviere en grond, met ’n direkte invloed op landbou.
Die sprekers het spesifiek na Heidelberg se uitdagings verwys, insluitend opbouende rommel, onwettige storting, die verbranding van plastiek en rubber, plaagdoders met skadelike chemikalieë, en rioollekkasies.
Hulle het inwoners aangemoedig om enige moontlike besoedeling by die toepaslike owerhede aan te meld en het praktiese wenke gedeel:
• Gebruik nie-giftige chemikalieë vir plaagbeheer.
• Beoefen volhoubare landbou.
• Neem deel aan gemeenskapskoonmaakprojekte.
• Gebruik plastieksakke spaarsamig.
• Rapporteer onwettige storting.
Na die inligtingsessie het die gasvrou Elmarie Eygelaar die leiding geneem.
Daar is spesiaal aan tannie Betty van der Merwe, ’n stigterslid van die tak wat onlangs oorlede is, gedink.
’n Kers is ter nagedagtenis aan haar aangesteek.
Die voorsitter Susan Smit het ook ’n gehekelde kruis gewys – een van die items vir die opkomende kongres.
Die kruis het 30 horisontale steke, 13 vertikale steke en 33 tossels, elk met ’n besondere Christelike simboliek.
Die 33 tossels verteenwoordig Jesus se jare op aarde, die 30 horisontale steke sy stille jare tot die begin van sy bediening, en die 13 vertikale steke sy drie jaar van bediening en hemelwaartse roeping deur kruisiging, opstanding en hemelvaart.
Die kreatiewe deel van die dag het borduurwerk ingesluit op ’n klein hartvormige patroon wat in ’n sleutelhouer geplaas is, asook die bak van konfyt en verskeie brode wat deur medelede geproe en beoordeel is.
Die vergadering is afgesluit met kreatiwiteit, lekker kuier, en ’n blik op die volgende byeenkoms, naamlik Susan Coetzer se optrede op 9 September ten bate van die takfondsinsameling.
Vir meer inligting of om aan te sluit by die VLU Rensburg-tak, kontak vir Susan Smit by 084 568 2837.
