Gekombineerde Skool Balfour vier suksesvolle 2025 matriekjaar
Na ’n goeie 2025 matriekjaar met ’n 91,5% slaagsyfer, maak die Gekombineerde Skool Balfour gereed om hul 70-jarige bestaan tydens die Balifees te vier.
Gekombineerde Skool Balfour het ’n suksesvolle 2025 matriekjaar beleef deur ’n algehele matriekslaagsyfer van 91.5% te behaal.
Die uitslae toon dat 45% van die kandidate vir ’n Baccalaureusgraad gekwalifiseer het, terwyl 26% universiteitsdiplomas en 20% hoër sertifikate behaal het.
In totaal is 27 A-simbole en 68 B-simbole in die finale uitslae verwerf.
Die skool se top presteerder was Mohammed Vanka, wat vyf onderskeidings behaal het. Sy finale punte was: Engels Huistaal 81%, Afrikaans FAL 68%, wiskunde 79%, lewensoriëntering 88%, CAT 80%, besigheidstudies 92% en rekeningkunde 93%.
• Op 28 Februarie sal Balfour Gekombineerde Skool hul jaarlikse Balifees aanbied, wat saamval met die skool se 70-jarige herdenking.
Enigiemand wat meer inligting oor die herdenking of Balifees verlang, kan Judith Sides by 076 415 6604 kontak.
