Heigel Fotoklub bekroon Julie-fotokompetisie se wenners
Drie fotograwe is vir hul uitstaande inskrywings tydens Heigel Fotoklub se jongste kompetisie bekroon.
Die Heigel Fotoklub het op 12 Augustus sy gebruiklike maandelikse vergadering vir Julie gehou, waartydens fotograwe se beste inskrywings bespreek en die wenners aangekondig is.
Die klub is gestig vir fotograwe in die Heidelberg- en Nigel-omgewing wat hul fotografievaardighede wil ontwikkel, hul werk met ander fotograwe wil deel en aan kompetisies wil deelneem.
Die voorsitter Dawie de Villiers het die vergadering met ’n verwelkoming geopen. Daarna is die sowat 30 foto’s wat vir die Julie-kompetisie ingeskryf is deur die beoordelaars bespreek en die beste foto’s is aangewys.
Foto: Rienie van der Walt
Die voorgeskrewe tema vir Julie was “Cityscapes”, terwyl lede ook foto’s in verskeie ander kategorieë kon inskryf. Dit sluit onder meer natuur, voëls, ope, portrette, swart en wit, sport en joernalistiek, asook geboue in.
Michelle van Niekerk het met haar foto Rush Hour Blue die voorgeskrewe kategorie gewen. Die toekenning vir die beste algemene wenfoto het aan Heinrich van der Merwe gegaan vir Misty Sunset, terwyl Rienie van der Walt as die beste junior wenner aangewys is met Veertjie op ’n Stokkie.
Die voorgeskrewe tema vir Augustus is makrofotografie.
Die klub bied ook geleenthede vir fotograwe om hul kennis en vaardighede verder te ontwikkel.
’n Portretfotografie-werkswinkel word op 13 September by die Ou Tronk in Ueckermannstraat aangebied. Die werkswinkel sal deur Eugene Viljoen aangebied word.
Enigiemand wat belangstel om by die klub aan te sluit, meer oor fotografie te leer of hul fotografievaardighede te verbeter, kan vir De Villiers by 084 600 5765 kontak.
