Heidelberg rugbymanne nommer een in liga
Heidelberg Rugbyklub het Meyerton Knights met 24-22 geklop.
Ten spyte van ysige weer het Heidelberg Rugbyklub se eerstes nie teruggestaan om warm indrukwekkende rugby teen Meyerton Knights op 6 Junie op die teenstanders se velde te speel nie.
Beide spanne het gesukkel om momentum te kry, maar ná ‘n paar minute was daar geen keer aan die manne se aanval- en verdedigingswerk nie. Teen halftyd het Meyerton met twee drieë (teenoor een drie van Heidelberg) met 15-10 voorgeloop.
Die agterlyn se goedgeplaasde skopwerk het Louis Kilian en Cornelius Pruis die geleentheid gebied om oor die doellyn te duik. Adrian Paulse en Roaan Viljoen het die drieë verdoel en nog strafskoppe oorgesit.
Heidelberg wen die wedstryd met 24-22 en is tans nommer een in die eerste ronde van die Kestril liga.
Heidelberg Rugbyklub se volgende wedstryd is op 13 Junie om 16:00 op SA Leërgimnasium se velde waar hulle kragte met Vanderbijlpark sal meet. Vir meer besonderhede kan Chantal Jansen by 011 871 2303 geskakel word.
