Skenk water aan die Vrystaat
Die Kemptonpark-tak het reeds duisende liter water by afsetpunte besorg
DIE droogte pluk aan almal van ons se hartsnare, maar nou kan jy iets prakties daaroor doen.
Solidariteit Helpende Hand se takke in Gauteng-Suid samel liters water in om aan die droogtegeteisterde Vrystaat te skenk.
Lees ook:
• Laerskool Birchleigh samel 1 000 liter vir dorre Vrystaat in
Die projek se naam is Aquarius (waterdraer) en benodig soveel moontlik waterdraers om te help om die waterskaarste in die Vrystaat te verlig.
Adele Kruger, Helpende Hand se streeksorganiseerder in Gauteng-Suid, het besluit om die projek aan te pak omdat die droogte elkeen van ons raak.
“Die nuus loop oor van hartverskeurende foto’s van vel-en-been diere wat vrek, van braak, stowwerige mielielande en ’n onverbiddelike son uit ’n wolklose hemel,” sê Kruger. “Ons voedselsekerheid is in gedrang, ons moet saamstaan en hande vat rondom hierdie water- en voerkrisis.”
Die Kemptonpark-tak het reeds duisende liter water by afsetpunte besorg en bedank graag Birchleigh Buurtwag en die res van die gemeenskap wat reeds water bygedra het.
Om nog water of 2 liter bottels te skenk, kontak die Kemptonpark-tak se voorsitter, Ella Pieterse, by 082-406-3655.
