KYK: Kempies word stil vir Hoërskool Driehoek

Hoërskool Kempton Park het Maandagoggend (4 Februarie) ‘n minuut van stilte gewy aan die vier oorledenes van die Hoërskool Driehoek-brugtragedie.

Die Kempies moes vir die Jacaranda FM ontbytspan wys dat hulle gees het, maar nie voordat hulle aan die skool in Vanderbijlpark gedink het nie.

“Ek vra ook dat julle asseblief hierdie week geel en pers strikkies dra,” het skoolhoof Francois de Kock aan die leerder gevra. Skole regoor Suid-Afrika het op sosiale media gewys dat hulle só hul steun vir die hoërskool  sal wys.

Na die oomblik van stilte het Kempies se hoofmeisie Kyla Meyer en hoofseun Marcus Petersen ‘n kers aangesteek ter herdenking aan die kinders wat gesterf het.