Forum vra inwoners om sake by die polisiekantoor te open
Die Tzaneen Gemeenskapspolisiëringsforum (GPF) versoek inwoners om sake by die polisiekantoor te open wanneer misdade gepleeg word.
“Met die hulp van die GPF en die Community In Blue-subforum (CIB) is daar in die laaste week kriminele gevang. Ongelukkig word daar nie sake geopen wat tot die diefstalle verbind kan word nie.
“Die polisie het dan geen ander keuse as om die kriminele vry te laat nie,” sê Uwe Kröh, voorsitter van die GPF. Kröh het in September gemeld dat Aqua Park weer ‘n toename in misdaad ervaar. “Ons probeer hard om ons dorp veilig te hou. Ons doen weer eens ‘n beroep op inwoners om sake oop te maak,” sê hy.
Lees ook: Fransies laat ‘spat’ in die swembad
Die Tzaneense polisie, verkeersdepartement, publieke orde-polisiëringseenheid (POPS), sekuriteitsmaatskappye, GPF, CIB, die Groter Tzaneense Munispaliteit en die Young Civilians on Patrol het ook onlangs ‘n probleemarea in die middedorp deursoek en afgebreek.
Volgens Kröh was die veldtog suksesvol en is daar tydens die klopjag op dwelms beslag gelê. Om betrokke te raak by die CIBsubforum, skakel Jaco Rautenbach op 073 074 9716. Skakel Uwe Kröh op 076 833 9112 om betrokke te raak by die GPF.
