Marietjie Prinsloo vertel sy was Donderdag 15 Julie saam met haar dogter Carmen Taute en haar kleinseun, Pedrie (3) in die sentrum toe sy en Pedrie besluit het hulle gaan solank na die motor in die parkade bo Game.

Sy het voor gestap en toe sy op die trap klim, het sy haar balans verloor en geval. Die roltrap het aanhou beweeg en haar voete het na bo gelê.

“Iemand het die roltrap se noodstop gedruk en die roltrap het tot ‘n stilstand gekom,” vertel sy.

Lees ook: Tzaneen: Hulle sit die stop terug

Sy sê mense het haar te hulp gesnel en haar opgetel.

“‘n Ander persoon het my pakkies by hulle gehou terwyl nog ‘n vrou na Pedrie, wat aan die onderkant van die trap gestaan het, omgesien het.”

Sy sê die vrou wat haar opgetel het het in perfekte Afrikaans gevra, “Tannie, is jy oukei.”

“Ek wil net graag aan almal wat my gehelp het dankie sê.”

Sy sê almal was baie besorgd en het haar gehelp totdat haar dogter kort daarna opgedaag het.

Ek het niks verloor nie en niemand het die situasie uitgebuit nie, ten spyte daarvan dat ek goue juwele aangehad het” het Marietjie gesê.