Riebeeckrand skitter by Nasionale Eisteddfod
Hoërskool Riebeeckrand het verskeie toekennings tydens die Nasionale Eisteddfod ingepalm.
Hoërskool Riebeeckrand spog vanjaar met verskeie toekennings by die National Eisteddfod of South Africa- (NEA-) toekenningsaand.
Die skool het een ambassadeurstoekenning, drie kategoriewennertoekennings en vyf itemwennertoekennings ontvang.
Volgens Elzeri Wright, skoolwoordvoerder, is die Graad 8 Public Speaking-span, die Graad 9-redenaarspan en die Pom-poms as kategoriewenners aangewys. Die Pom-poms het ook ‘n ambassadeurstoekenning ontvang.
“Die Graad 10-, 11- en 12-spanredenaars is as itemwenners aangewys, so ook die spreekkoor en die dramagroep van die skool. Devonique Breedt, ‘n Graad 10-leerder, het ‘n tweede plek in die Top 10 van Gauteng-Wes behaal, asook ‘n medalje as kategoriewenner in English Poetry.
“Hoërskool Riebeeckrand se koor, spreekkoor, vier dansgroepe, Pom-poms, 11 redenaarspanne, 11 Public Speaking-spanne, vier dramagroepe en twee toneelgroepe het vanjaar aan die NEA deelgeneem,” het sy vertel.
Volgens Elzeri is die Riebeeckrand-familie baie trots op al hul kultuurleerders en hulle afrigters.
“Hul harde werk en uitstekende prestasies word raakgesien en dit maak ons trots.”
