Jannas presteer by spog interskolebyeenkoms
Jannas spog met ses goue-, nege silwer- en agt bronsmedaljes tydens die 2021 NWU Interskole byeenkoms in Roodepoort.
Hoërskool Jan Viljoen se atlete het uitgehaal en gewys tydens die 2021 NWU Interskolebyeenkoms by die Ruimsig-stadion in Roodepoort op Woensdag, 7 April.
Mariska Durant, skoolwoordvoerder, het gesê al was hulle daar in kleiner getalle het al 32 hul atlete puik presteer.
Jannas spog met ses goue-, nege silwer- en agt bronsmedaljes wat hulle tydens die byeenkoms verower het.
“Vier van ons koshuisleerders het ook puik presteer, en ons was die enigste skool in Randfontein wat aan die byeenkoms deelgeneem het,” het sy vertel.
Die ander skole wat deelgeneem het was Hoërskool Roodepoort, Hoërskool Bastion, Hoërskool Florida, Hoërskool Dinamika, Bergsig Akademie, Hoërskool Merensky, Hoërskool Die Anker, Pretoria Boys High, Pretoria Girls High en Potch Girls High.
Die hele byeenkoms is regstreeks vir die ouers en ander belangstellendes uitgesaai aangesien geen toeskouers toegelaat is nie.
