Victor Bravo sien uit na die feestyd
“As jy die gees van die feesseisoen behoorlik wil vasvang, sit die radio en Kersliggies aan of drom om die klavier saam om saam te sing en maak spesiale herinneringe wat jy vir altyd sal koester.”
Victor Bravo is ’n duo wat die vaardigheid en passie van twee talentvolle, veelsydige en vermaaklike musikante kombineer.
Die duo het al suksesvolle radio-enkelsnitte vrygestel, met die jongste een “Solank die Liefde Bly”.
Hulle het Afri-Indie Independent-toekennings in 2021 en 2022 gewen; Beste Algehele Enkellopend vir “Breakway Line”, Beste Duo Enkellopend “Skemer” en Beste Kontemporêre Enkelsnit “Suiderkruis”.
Victor Bravo het aan Rekord gesê die feestyd is ’n tyd wat hulle na aan die hart lê. “Voordat Victor Bravo gevorm is, het ons altyd saam musiek gemaak by familiebyeenkomste en doen dit vandag steeds wanneer ons die kans kry.
“Daarom sien ons uit na die feestyd, wat nie net sinoniem is met kuier en familie nie, maar ook met die mooiste Kersliedere.
“As jy die gees van die feesseisoen behoorlik wil vasvang, sit die radio en Kersliggies aan of drom om die klavier saam om saam te sing en maak spesiale herinneringe wat jy vir altyd sal koester.”
Die hoofsanger en liedjieskrywer, Weco van Basten, kom uit ’n musikale familie wat sy talent op die braaitoneel tussen familie en vriende gevind het.
Hy is van jongs af passievol daaroor om mense te vermaak, en daarom is Van Basten Amerika toe om drama en Engelse kreatiewe skryfwerk te studeer, terwyl hy ook nog in die akoestiese groep, Victim, opgetree het.
Van Basten se nefie, Jopie Pienaar, vorm die ander helfte van die dinamiese duo as hoofkitaarspeler, sanger en liedjieskrywer.
Pienaar, wat ook ’n crossfit-afrigter is, weet hoe om die kitaar se klanke na vore te bring nadat hy geïnspireer is deur Straatligkinders, waar hy sy eerste rockkonsert op 14 gesien het.
Hy het kort voor lank vir hom ’n kitaar gekry en by ’n band genaamd Mad About You aangesluit toe hy nog op hoërskool was.
Om met Van Basten om die kampvuur te speel is egter waar hy sy plek gevind het en ook die oorsprong van Victor Bravo.
Die naam is afgelei van die van, Van Basten, wat hul familiebande en herinneringe aan hul familiesamekomste met musiek, en wat dit vir hulle beteken het, voor oë hou.
Hul eerste enkelsnit het in November 2018 gedebuteer met “Breakway Line”, wat ’n oorweldigende positiewe reaksie van luisteraars ontvang het.
Met ’n unieke styl bring Victor Bravo se musiekelemente van alternatiewe, kontemporêre, rock, pop, folk en blues op ’n naatlose manier in. Hulle musiek is toeganklik en gemaklik vir ’n wye verskeidenheid musieksmaak en ouderdomsgroepe.
Kyk na hul nuutste enkelsnit, “Solank die Liefde Bly”.
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie.
