Geldkollekteerder is al deur die meule van die lewe

Me. Colleen Breedt (59) kollekteer al vir agt jaar geld vir die Lewens Kruispaaie Sorgsentrum anderkant Vereeniging.

Sy het ’n heenkome by dié sentrum gevind nadat die lewe haar rof behandel het en sy nêrens anders heen gehad het om te gaan nie.

Me. Breedt het as tuisversorger gewerk voordat sy by die sentrum geland het.

Sy het hartseer van haar kinderlewe vertel en hoe sy daagliks deur haar ouers geslaan is.

Die gesin het baie rondgetrek want haar pa het gedurig nuwe werk gekry.

“My pa wou nie werk nie en ons het gereeld by vriende en familie gebly,” het sy gesê.

Haar pa was een aand dronk en het ’n ongeluk gemaak met haar, haar ma en haar broer in die motor.

Me. Breedt het haar rug seergemaak en volgens dokters moes sy eintlik in ’n rolstoel gewees het.

Die ongeluk het egter sy letsels gelaat en me. Breedt moes op die ouderdom van nege jaar na ’n spesiale skool gaan omdat haar brein seergekry het.

Sy is op 16 getroud om uit die huis te kom en het toe skool gelos.

“Dit is waarom ek as tuisversorger gewerk het, want ’n mens hoef nie te kan lees of skryf nie,” het sy gesê.

Sy het vier kinders, twee dogters en twee seuns.

“My twee dogters sukkel self en ek help hulle as ek geld het, want hulle het kinders.”

Me. Breedt sien haar dogters en kleinkinders nou en dan.

“Ek weet nie waar my twee seuns is nie.

“Een is deur ’n ryk familie gehelp en as ek nou met hom kontak maak, sal hulle alles wegneem wat hy het.”

Haar ander seun het me. Breedt twee jaar terug in Gauteng gesien en sy het die pastoor van die sentrum se telefoonnommer vir hom gegee, maar sy weet nie of hy ooit kontak gemaak het nie.

Haar getroude lewe was hel met haar eerste man wat haar oudste seun sedert hy ’n baba was geslaan het. Sy is geskei en is later weer getroud, maar het haar tweede man weggejaag nadat sy op hom afgekom het waar hy haar kleindogter verkrag het.

Hy het haar voor die tyd verkul en het ’n drankprobleem gehad.

Me. Breedt het gesê sy bly nou lekker by die sentrum en maak haar kamer skoon en doen haar wasgoed as sy nie geld kollekteer nie.

https://www.citizen.co.za/ridge-times/97783/lizzie-stig-destydse-kinderbeskermingseenheid/

Vir meer nuus besoek gerus ons ander webblaaie. Standerton Advertiser & Highvelder

“Like”’ ons op Facebook en volg ons op Twitter en Instagram.