Kapt. Carla Prinsloo, woordvoerder van Ermelo Polisie het onlangs aan die Hoëvelder gesê dat daar sedert 17 April geen ernstige misdaad by die polisie aangemeld is nie.

Sy het bygevoeg dat daar in die tydperk 30 mense vir verskeie oortredings met betrekking tot die Rampbestuurswet (Wet 57 van 2002) inhegtinis geneem is.

Alle inwoners word aangemoedig om afgesien van noodsaaklikhede wat hul benodig, by hul huise te bly en die regulasies van die inperking te gehoorsaam.

Die Hoëvelder het op 20 April opgemerk dat die hoofstraat van Ermelo byna soos ’n gewone dag gelyk het.

’n Inwoner wat verkies om anoniem te bly, het ’n foto aan die Hoëvelder verskaf, waar gesien word hoe inwoners nie by die 1m distansëringsmaatreëls hou nie en gesê het dat die foto omstreeks 4nm by Ermelo Provinsiale Hospitaal geneem is.

Die inwoner het genoem dat dit kommerwekkend is oor hoe min mense hulle aan die sosiale distansëringsmaatreëls wat in plek is om die verspreiding van die covid-19 virus te bekamp, steur.