N12-liggaam: Polisie glo Franse vrou is elders vermoor

Me. Lia Adeline, ’n Franse vrou van die Seychelles wie se liggaam verlede maand langs die N12 gevind is, is heel moontlik nie in haar huis in Crystalpark, Benoni, vermoor nie.

“Tydens ’n besoek van die ondersoekbeampte aan die woning, kon geen aanduidings van ’n struweling of enige bloed gevind word nie,” het kapt. Carla Hartley, mediawoordvoerder vir die Delmas Polisie, gesê.

Dié 45-jarige me. Adeline is na alle waarskynlikheid elders vermoor, waarna haar liggaam op geheimsinnige wyse in die stormwatersloot digby Delmas beland het.

Haar liggaam het vir bykans ’n maand as ’n onbekende vrou in die lykshuis op Delmas gelê.

Binne enkele ure nadat die profiel van ’n vermiste persoon verlede week op sosiale media verskyn het, is haar liggaam positief uitgeken as dié van me. Adeline.

Familielede, vergesel deur lede van die Seychelles Hoë Kommissie, het op Woensdag, 17 November bevestig dat die liggaam van ’n vermoorde vrou, dié van me. Adeline is.

Me. Adeline se bejaarde moeder, slegs bekend as Agnes, het haar dogter se liggaam uitgeken.

Dié gebeure het gevolg nadat die halfnaakte liggaam van ’n vrou op Vrydag, 22 Oktober omstreeks 14:00 deur ’n verbyganger teen ’n wal by ’n stormwatersloot by die Argent/Dwarsfontein-afrit aan die N12, in die rigting van Witbank, opgemerk is.

Lede van die Middelburg Blitspatrollie is in kennis gestel, waarna die Delmas Polisie na die toneel ontbied is (Streeknuus, 5 November).

Onder die slagoffer se liggaam was ’n kombers, laken en handdoek. ’n Bloesie met blommotiewe is ook naby die liggaam gevind.

Sy was slegs in ’n swart skibroek geklee.

’n Bos sleutels, van onbekende oorsprong, is op die toneel gevind.

Dit is nog onbekend of die sleutels met die moord op me. Adeline verbind kan word.

Tydens ’n nadoodse ondersoek, is bevind dat sy vier harde houe aan die regterkant van haar kop, agter haar oor toegedien is.

Die moontlikheid dat die houe deur van ’n gholfstok toegedien is, is genoem.

Me. Adeline het in Maart 2019 met ’n man van Malawiese afkoms in die huwelik getree, maar die egpaar het intussen vervreemd geraak.

Streeknuus het intussen ook betroubaar verneem dat ’n aansienlike bedrag uit me. Adeline se rekening onttrek is tussen die dag waarop sy verdwyn het, en toe haar liggaam gevind is. ’n

Vriendin van me. Adeline het ook bevestig dat sy op 21 Oktober vir die laaste keer met me. Adeline in kontak was, maar dat iets in haar (me. Adeline) stemtoon nie pluis geklink het nie.

Teen druktyd kon kapt. Hartley slegs bevestig dat die ondersoek na die moord op me. Adeline prioriteit geniet.

Niemand is nog in verband met haar dood in hegtenis geneem nie.

LEES OOK: Vrou wie se liggaam aan die N12 gevind is, het nou ’n naam

Verbygangers vind vrou se lyk langs N12

Polisie meen vrou is met gholfstok doodgeslaan