10-jarige van Secunda met oogprobleme kry splinternuwe bril, maar benodig steeds hulp vir operasie
Gesin benodig steeds R67 000 vir oog-operasie.
Lamaine van Rooyen (10), wat sedert haar geboorte sukkel met haar oë, het verlede week ’n splinternuwe bril gekry.
Lamaine se oë hang sedert haar geboorte, maar mense het vir haar ma, Bronwyn Botha, gesê dit sal beter word.
Haar toestand het egter net vererger soos wat sy ouer geword het.
Botha het haar na die Steve Biko Hospitaal geneem waar dokters gesê het sy moet ’n oog-operasie in beide haar oë kry, maar die waglys is minstens twee jaar lank.
De Necker Oogkundiges het van Lamaine se situasie gehoor en haar ma, Bronwyn Botha, geskakel en gesê sy moet Lamaine neem vir ’n oogtoets.
“Ons is baie dankbaar dat sy darem weer ’n nuwe bril kon kry,” het Botha gesê.
Lamaine kry swaar op skool omdat sy sukkel om te sien en sy benodig dringend die oog-operasie.
Die gesin het nie ’n mediese fonds nie en benodig sowat R70 000 om beide Lamaine se oë te laat opereer.
Hulle het reeds R3 000 ingesamel met Back-A-Buddy en benodig dus nog R67 000.
As jy Lamaine wil ondersteun of ’n bydrae wil maak, besoek die Facebook-blad, Fundraiser for Lamaine of die webwerf, https://www.backabuddy.co.za/lamaine-du-plessis-2022.
LEES OOK: 10-jarige van Secunda sukkel op skool weens swak oë
