Cullies-rugbyspeler vir Griekwas-amateurspan gekies
“Die hele Cullinan staan agter hierdie talentvolle jong man.”
George Neuhoff (22), ’n jong en talentvolle rugbyspeler, is gekies om by die Griekwas-amateurspan aan te sluit. Nieuwhof is reeds sedert sy skooldae baie toegewyd aan die spel van rugby en het ook in verskeie klub- en streekswedstryde uitgeblink.
Hierdie toewyding en spelvernuf het vrugte afgewerp en die aandag van die Griekwas Rugbyunie getrek, wat gelei het tot die uitnodiging om by die span aan te sluit.
Die Griekwas-amateurspan is veral bekend vir hul fokus op talentontwikkeling en bied jong spelers die kans om hul vaardighede te slyp vir moontlike deurbraak na professionele rugby.
Johannes Bekker, Wyk 100-raadslid, het Neuhoff se prestasie verwelkom, “Dit is altyd ’n bron van trots vir ons as gemeenskap wanneer een van ons eie op so ’n hoë vlak erkenning kry.
LEES OOK: Standerton lawyer reflects on decades of dedication to law after unexpected start
“George is ’n voorbeeld van wat harde werk, dissipline en geloof in jou drome kan bereik. Ek wens hom alles van die beste toe met sy rugbyloopbaan en glo dat hy nog hoë hoogtes sal bereik.”
“Die hele Cullinan staan agter hierdie talentvolle jong man,” het Bekker afgesluit.
Neuhoff het sy dankbaarheid teenoor die gemeenskap uitgespreek en gesê hy sien uit daarna om sy nuwe span trots te maak.
“Ek is dankbaar vir die ondersteuning van my familie, afrigters en die mense van Cullinan – ek dra hierdie mylpaal aan hulle op,” het Neuhoff gesê.
