Sasol-ringbalklub spog met 22 lede in span
Die Suid-Afrikaanse kampioenskap gaan ook ’n geskiedkundige oomblik vir die Potgieter-familie wees, want drie geslagte Potgieters sal dan aan dieselfde toernooi deelneem
SECUNDA – Die Sasol Secunda Ringbalklub spog met 22 lede wat gekies is om in Junie aan die Suid-Afrikaanse Nasionale Ringbalkampioenskap deel te neem.
Die lede is op ‘n spoggeleentheid van die Mpumalanga Noord Ringbal-distrik (MNRD) wat op 13 April gehou is, aangekondig.
Hulle sal deel wees van die spanne wat die MNRD by die Suid-Afrikaanse Kampioenskap in Pretoria vanaf 23 tot 29 Junie verteenwoordig.
Die klub se spelers moet nou elke Woensdag op Middelburg saam met die res van die distrikspan oefen wat ook op 1 en 8 Junie aan vriendskaplike byeenkomste in onderskeidelik Sedibeng (Meyerton) en Rustenburg sal deelneem.
Die Suid-Afrikaanse Kampioenskap gaan ook ‘n geskiedkundige oomblik vir die Potgieter-familie wees, want drie geslagte Potgieters sal aan dieselfde toernooi deelneem.
Mnr. Corrie en me. Ansa Potgieter en hul seun, mnr. Pottie Potgieter is as spanbestuurders gekies.
Die egpaar se ander seun, Willie Potgieter en sy vrou Adri, is as spelers gekies en hul kleinseuns, Xavier, Corné en Logan is in die juniorspan wat aan die kampioenskap gaan deelneem.
