Perderuiters neem deel aan skou op Secunda
"Hulle het hulself uitstekend van hul taak gekwyt," het me. Smit gesê.
SECUNDA – Perderuiters het onlangs hul vaardighede in rykuns gewys by die Suid-Afrikaanse Perdryskou wat by die Peraldi Ruitersentrum aangebied is.
Verskeie ruiters van Peraldi het met plekke weggestap.
Maruné Prinsloo op haar perd Juliah het die afdeling vir 10 jaar en jonger gewen, Lindé van der Merwe op haar perd Prins het die afdeling vir 18 jaar en jonger gewen en Ivan Mogoera op sy perd Olga het die afdeling vir volwassenes gewen.
Die jongste ruiter van Peraldi Ruitersentrum was Ava Shambo (5) wat op Milo gery het. Sy het ‘n eerste plek, twee derde plekke en ‘n vierde plek in die 10 jaar en jonger-afdeling behaal.
Volgens die eienaar van Peraldi Ruitersentrum, me. Yolande Smit, het daar altesaam 29 ruiters deelgeneem aan die skou en baie ruiters en hul perde het vir die eerste keer aan ‘n skou deelgeneem.
“Hulle het hulself uitstekend van hul taak gekwyt,” het me. Smit gesê.
Me. Nicolene du Toit was die skoubeoordelaar en is ondersteun deur me. Estelle van Niekerk as skriba.
Me. Smit het elke ouer, ruiter, ondersteuner en elkeen wat hard gewerk het om die dag mootlik te maak, bedank.
Sy het ook die borge vir die dag wat André Thirion Enquine Dentistry, GP Leather Trichardt, ALZU Trichardt en Pelipa Equestrian Wear insluit, bedank.
