Bronkies-blits is tans by Afrika-kampioenskap

Werner Gouw van Bronkhorstspruit neem tans deel aan die o18- en o20-Afrika-atletiekkampioenskap in Abeokuta, Nigerië. Dié matriekleerder aan die Afrikaanse Hoër Seunskool in Pretoria is vir die Suid-Afrikaanse o20-span gekies ná sy puik vertoning tydens die Suid-Afrikaanse Junior Atletiekkampioenskap by Groenpunt, Kaapstad, vroeër vanjaar.

Werner het daar die 800m-wedloop vir mans o20 gewen. Hy is daarna genooi na die senior SA-kampioenskap in Potchefstroom.

Die Afrika-kampioenskap vind van 16 tot 20 Julie plaas, en die jong atleet sal ook hier aan die 800 m-wedloop deelneem. Werner is ’n oud-leerder van Laerskool Du Preez van Wyk. In ’n vorige onderhoud met Streeknuus het hy vertel dat die Olimpiese Spele sy uiteindelike doelwit is.