Vrou hoor oor foon hoe haar man tydens aanval geskiet word
’n Vrou van Geduld moes magteloos oor die foon luister hoe haar man aangerand en geskiet word nadat hy langs die pad met ’n pap band gestrand was. Hy is later in die hospitaal oorlede.
’n 66-jarige vrou van Geduld moes Donderdag oor die foon hoor hoe haar man (69) aangerand en uiteindelik geskiet word, nadat hy langs die pad met ’n pap motorband gestrand was.
Moira Odendaal en ander familielede het dadelik na die plek gehaas, waar Kallie Odendaal geskiet is.
Die voorval het omstreeks 05:00 plaasgevind, net ’n klipgooi van die Langlaagte-polisiestasie. Hoewel ’n swaar gewonde Kallie by ’n hospitaal kon uitkom, is hy ongeveer 11:40 oorlede.
Volgens sy seun, Kallie jr Odendaal (46), was sy pa daardie dag van Upington af op pad huis toe nadat hy vir ’n paar dae daar werksverpligtinge nagekom het.
Na wat verneem word, het ’n band van sy motor in Main Reefweg gebars, nie ver van die Langlaagte-polisiestasie nie.
“Hy het uitgeklim en was besig om die band te ruil terwyl hy ook met my ma op die foon was om aan haar te verduidelik waar hy was en wat gebeur het,” het Kallie vertel.
“My ma het skielik vreemde stemme gehoor en ook hoe my pa pleit dat hulle hom asseblief moet uitlos. Dit is toe dat hy geskiet is.”
“My ma het ons almal laat weet en ons het na die plek gehaas waar ons gedink het my pa sou wees.
Volgens Kallie kon sy gewonde pa daarin slaag om terug te klim in sy Jetta en na ’n nabygeleë vulstasie te ry.
“Dit is daar waar ons hom aangetref het. Hy is toe na die Helen Joseph Hospitaal geneem, waar hy later oorlede is.”
“My pa was ’n hardwerkende mens wat steeds vir sy gesin gesorg het, en daar was baie mense wat van hom afhanklik was.
“Die persoon of persone wat hom oorval het, het net sy selfoon gevat. Sy beursie met kontant en al sy ander besittings was nog by hom,” het Kallie gesê.
Sy kleindogter, Phoebe Hirselmann, het gesê haar oupa was vir haar soos ’n pa, en dat sy dood ’n groot verlies is vir almal wat hom geken het.
Die gesin sukkel om die begrafnisreëlings te finaliseer en het intussen ’n BackaBuddy-veldtog onder die naam van Kallie Odendaal begin.
Enigiemand wat die gesin wil ondersteun kan dit op die wyse doen.
https://www.backabuddy.co.za/campaign/kallie-odendaal
Die voorval word deur die SAPD ondersoek.
