Trappies-gemeente geniet boeretroos en beskuit
Ds. Maans van Zijl en die gemeente het weggelê aan heerlike bobaas beskuit na afloop van Sondag se erediens.
Na die laaste ‘amen’ en die seënbede van die erediens die afgelope Sondag, het die NG Trappies-kerk se gemeente hartlik saamgetrek vir ‘n gemeente kuiertjie.
Die kerksaal het op 19 Oktober vinnig gevul met die aangename geur van sterk, varsgebroude boeretroos – daardie lekker koffie wat die gemoedere verkwik. Die middelpunt van die kuier was egter die heerlike beskuit.
Dit was nie net enige beskuit nie, dit was Marthlé Smith, die RSG en Virseker se Bakgat-beskuitkompetisie se nasionale wenner se beskuit.
Terwyl koppies geklink en beskuit in die warm koffie gedoop is, het die gasvryheid en opregte warmte wat die kern van die NG Trappies-familie vorm, opnuut geseëvier.
Hierdie gedeelde oomblikke ná die diens bou bande van geloof en vriendskap wat die gemeente so uniek maak.
“Ai, die beskuit was darem nou lekker,” het ds. Maans van Zijl gesê terwyl hy nog ‘n stukkie in sy koffie gedoop het.
Nuus wat saak maak … Volg WITBANK NUUS op ons webtuiste, Facebook, Twitter, Instagram of TikTok
Gesels met ons: info@witbanknews.co.za
