Terwyl die res van die land die feesseisoen gevier het, was daar vanjaar ‘n oorverdowende stilte in die Vosloo-huis.

Vir die eerste keer het Zariskia Czövek se opgewonde lag nie deur die huis weergalm terwyl sy haar geskenke oopgemaak het nie.

Alhoewel tien maande reeds verloop het sedert die tragedie, bly die wond vir mamma Venice Vosloo steeds rou.

Zariskia is op 28 Februarie dood in ’n gastehuis in Pietersburg aangetref.

Haar ma het vertel hoe sy na ’n lang rit aan die slaap geraak het terwyl Zariskia teen 20:30 gaan stort het.

Die nagmerrie het om 23:30 begin toe haar man haar wakker maak omdat die tiener steeds nie uit die badkamer was nie.

Nadat hulle die deur oopgekry het, het hulle Zariskia se liggaam  agter die deur gevind.

Vosloo het desperaat kunsmatige asemhaling toegepas en onverpoos gebid terwyl sy na ’n polsslag gesoek het, maar dit was te laat.

Die vermoede bestaan dat Zariskia deur gas oorval was terwyl sy gestort het.

“Vandag 13 jaar terug het God my ‘Babyloo’ vir my gegee; vandag gee ek haar terug aan God,” het ’n diep bedroefde Vosloo tydens die roudiens gesê.

LEES MEER HIER Zariskia word vandag te ruste gelê

Mike Bolhuis se span neem die tiener, Zariskia Czövek, wie in ’n gastehuis dood gevind is, se ondersoek verder
Lees meer hier : https://t.co/BnG1tNvRTy#Witbanknuus #Zariskia #emalahleni #Witbank

— WitbankNews (@WitbankN) June 13, 2025

Wag op antwoorde

Spesialis-ondersoeker Jacques Visser van Mike Bolhuis se ondersoekspan, wat die ondersoek na Zariskia se dood ondersoek, het bevestig dat daar tans geen nuwe verwikkelinge is nie.

“Die ondersoek gaan voort en ons sowel as die polisie wag vir dokumente. Sodra ons al die dokumente het sal die ondersoek voortgaan soos beplan,” het Visser gesê.

Nuus wat saak maak … Volg WITBANK NUUS op ons webtuiste, Facebook, Twitter,  Instagram of TikTok

Gesels met ons: info@witbanknews.co.za