Die Cliviaklub in eMalahleni het dié naweek met hul clivias kom spog.

Uitstallers het hul “kinders” op 22 Augustus by Duckpond ten toon gestel.

Samantha Visagie het vertel dat dié plant goed in houers en in die tuin groei en nie van direkte sonlig hou nie.

Sy het die wetenskap agter die teel van die plante verduidelik.

“Dit kan dae neem, want jy haal stuifmeel uit een plant en plaas dit in ’n ander en begin bid en duim vashou,” het sy gesê.

Die meeste mense het die tuinclivias wat oorwegend oranje is, maar toe variante beskikbaar raak, het cliviakoors behoorlik posgevat.

Daar is vandag ’n groot verskeidenheid kleure beskikbaar en ’n groot opskudding is veroorsaak toe die groenkleurige clivia gekweek is.

Die eerste een in Suid Afrika het R32 000 op ’n veiling gehaal.

Die breëblaarclivia is ook baie gesog en Samatha het een van hulle.

“Clivias is trots Suid Afrikaanse skatte,” het Henro Kruger gesê.

Ook sy uitstalling was iets vir die oog.

Toe daar ’n tor op een van die clivias gaan sit en na ’n ander clivia vlieg, het Henro se moed sommer in sy skoene gesak.

“Hierdie skade gaan ons eers oor vyf jaar kan sien. Dis nou die natuur se dwarsklap,” het hy gesê.

June Clark het ook met haar clivias gespog en gesê sy is daarop uit om ’n clivia te kweek wat R100 000 op ’n veiling gaan losslaan.

Volgens die Stodels-tuinklub is ’n cliviaplant wat Charl Green genoem word, verkoop vir R36 000, terwyl ’n Chinese kweker sy breëblaarclivia in 2009 vir $2,9 miljoen op eBay geadverteer is.

Jou stad, jou storie soos dit gebeur. Bly op hoogte met die jongste nuus met WITBANK NUUS,

Volg ons op  website, Facebook, X,  Instagram or TikTok

Epos: info@witbanknews.co.za