Laerskool Kragbron het ʼn mini-sportdag aangebied vir hokkie en krieket.

Dit was ʼn heerlike dag met gesinne wat rondom die hokkie- en krieketvelde bymekaar gekom het op 13 Augustus om die jong atlete te ondersteun.

Pappas en oupas het opgewonde geword op die krieketveld en hand bygesit waar armpies gebuig het of kolwe verkeerd vasgehou is.

“Ons speel vir pret en vaardigheidsontwikkeling, maar die seuns toon al baie potensiaal. Dit is lekker om te wen, maar belangriker om dit te geniet,” het een van Laerskool Kragbron se o.7 krieketspan-afrigters en organiseerder van die mini-krieket vir die dag, Francis Koekemoer gesê.

Op die anderkant van die veld kon hokkiestokke nie stilgehou word nie. Mammas en pappas het trots ondersteun rondom die hokkiewedstryde.

“Ek is trots op elke liewe seun en dogter wat vandag gespeel het en hulle 110% gegee het. Dit is so lekker om weer die gelag van die kinders te hoor en opgewondenheid raak te sien van ʼn myl,” het een van die afrigters van Laerskool Kragbron se o.7 seuns hokkiespan en organiseerder van die mini-hokkie vir die dag, Eunice Pieters gesê.

Tien skole het die dag geniet en bygewoon: Laerskool Kragbron, Laerskool Klipfontein, Laerskool Taalfees, Laerskool Panorama, Witbank Primary School, Laerskool Marble Hall, Curro Bankenveld, Cambridge, Robert Carruthers School en Greendale Primary School.

Die kinders het die dag vreeslik geniet en die samesyn was heerlik na twee jaar waar daar geen sport was nie.

Deel jou nuusbrokkies met ons

Telefoon: 013 656 2490 WhatsApp: 060 866 8682 Epos: info@witbanknews.co.za

Of volg ons op sosiale media platforms

Instagram Twitter Witbank News App Facebook page Witbank News Breaking