Brakpan tiener behaal groot prestasies in rugby

Chemikè Visser, ’n besonder talentvolle sportliefhebber van Dalpark, is nie net ’n Blou Bul-rugbyspeler en lid van die Tuks Rugbyklub nie. Sy is ook ’n toegewyde atleet – en dit alles terwyl sy nog in Graad Agt is.

Met drie rugbyoefeninge per week toon sy reeds die toewyding van ’n professionele sportpersoon.

Sy is vanjaar gekies tot die Blou Bulle Meisies Jeug o16-span as agtsteman. In die span se laaste wedstryd teen Border CD tydens die o16- en o18 Nasionale Meisiesweek by Queens High School is sy as speler van die wedstryd aangewys.

Boonop is sy gekies vir die Gauteng o15 -span vir die Winter National School Sport Championships, wat van 12 tot 14 Julie plaasgevind het by die Universiteit van KwaZulu-Natal Howard-kampus, Old Mutual Sportsaal in Durban.

LEES OOK: Home Affairs supports learners with longer office hours

Wanneer sy nie rugby speel nie, is sy op die atletiekveld en -baan, waar sy gewigstoot en diskus doen. Tydens die rugbyseisoen het sy elke Sondag ’n privaat sessie met haar kondisioneringsafrigter, waar sy aan haar fiksheid en krag werk.

Chemikè, ’n Graad Agt-leerder aan Hoërskool Waterkloof, het groot lof vir haar atletiekafrigter, Riëtte Heyns, wat haar baie inspireer.

Chemikè was ook ’n stoeier vir die Brakpan Stoeiklub, die Bulldogs, en het drie SA titels agter haar naam. Sy sou steeds wou stoei, maar haar dokter het vir haar gesê dat dit tyd is om te kies tussen stoei en rugby.

Die impak van albei sportsoorte saam was eenvoudig te veel vir haar knieë.

LEES OOK: East Rand Palliative Care walks the journey with patients and families